Apre imaj ki montre yon avyon Sunrise Airways frape pa bal sou tamak Ayewopò Guy-Malary, Pati Fizyon leve vwa li. Direksyon pati a kritike move jesyon sektè ayeryen an, mande limyè sou finans konpayi an, epi denonse pri biyè ki tounen yon gwo chay ekonomik pou Ayisyen.
Pati Fizyon Sosyal-Demokrat Ayisyen (PFSDH) salye kouraj pèp ayisyen ki kontinye lite ak yon ensekirite k ap toupizi lavi chak jou. Pou plis pase yon lane, Fizyon atake “endiferans pouvwa egzekitif la” ki kite popilasyon an san okenn espas pou respire, pandan gang pran kontwòl wout yo epi kraze dwa moun pou sikile lib.
Dènye evènman an, kote yon avyon Sunrise ta resevwa bal sou tamak ayewopò a, reveye plizyè gwo kesyon. Fizyon estime evènman an twòp lou, twò trouble, e li mande yon ankèt rapid pou klere opinyon piblik la.
Pati a prezante twa gwo enkyetid :
- Kote lajan taks Leta a pase ?
Daprè Fizyon, Sunrise ranmase taks sou biyè pasaje yo depi ane, men li pa janm depoze kòb sa yo nan kès Leta.
Okontrè, selon pati a, responsab konpayi an ap fè presyon pou Leta efase dèt la, tankou si se lajan yo te prete.
- Yon monopòl ki blese peyi a
Fizyon akize pouvwa a dèske li mete kanpe yon fon garanti espesyal pou soutni Sunrise, yon aksyon ki fè konpayi an vin tounen sel kòk chante k ap domine espas ayeryen Ayiti a.
Pati a di Leta toujou pa bay okenn esplikasyon sou plizyè ka bal ki te frape lòt aparèy ane pase yo.
- OFNAC mete plis konfizyon pase limyè
Temwen ki te nan ayewopò a samdi pa rapòte okenn panik, malgre yo ta sipoze wè “atak”.Fizyon di kominike OFNAC la ogmante latwoubday olye li esplike sa ki pase.
Pati a poze gwo kesyon :
“Eske se pa yon manèv pou FAA pa leve sanksyon sou Ayewopò Pòtoprens la ?”
Pri biyè avyon yo fè pèp la vin esklav nan pwòp peyi pa li
Pati Fizyon mete gwo aksan sou yon verite tout Ayisyen konnen : pri biyè avyon yo depase limit, san okenn jistifikasyon.
250 dola ameriken pou sèlman 18 minit vòl Pòtoprens – Okap
1 350 dola pou yon ale-retou Okap – Miami
Men yon Ayisyen k ap fè Sendomeng – Miami peye sèlman 500 dola
Fizyon rele sa “gwo abi, gwo vòl ki fèt sou do pèp la, sitou lè pifò moun pran avyon pa plezi, men kòm dènye chwa pou evite wout ki anba men nèg ame.
Pati a lanse yon kri :“Pèp la pa ka kontinye peye biyè avyon tèt nèg konsa ankò !”
Pati a mande :Yon ankèt serye, rapid ak pwofon pou konnen ki sa ki te pase vre ak avyon Sunrise la.
Louvri wout yo prese prese, pou moun ak machandiz sikile san pè, pou popilasyon an pa depann sèlman de vòl chè ki kraze ekonomi fanmi yo.
Fizyon fè konnen se lè pou leta mete fen nan dezòd, pwoteje konsomatè yo, epi regle nèt tout kesyon ki sal non aviyasyon ayisyen an.
RL News
About the Author
